1.
Pranatacara
ing acara lamaran
Assalamu ’alaikum Wr. Wb.
Kula nuwun,
Para
pinisepuh, sesepuh ingkang satuhu kinabekten, para tamu duta saking kulawarga
calon besan ingkang tansah kinurmatan, saha para rawuh kakung sumawana putri
ingkang bagya mulya.
Langkung
rumiyin mangga tansak ngaturaken raos puja puji syukur wonten ngarsanipun Gusti
Ingkang Maha Welas saha Asih, awit kita sedaya sampun pinaringan karaharjan
saha kawilujengan saengga saged makempal wonten papan menika boten kirang
satunggal punapa. Lan sak derengipun kula kathah matur wonten ngarsa panjenengan,
mbok bilih samangke kathah kalepatan kula namung nyuwun agunging samodra
pangaksama.
Saking
keparengipun ingkang hamengku gati inggih menika Bpk. Darmo Wiyono sekalian,
kula minangka pranatacara badhe ngaturaken rerantamaning adicara pasrah
panampining lamaran ing wekdal menika, ingkang sampun karakit inggih menika :
1)
Pambuka
2)
Atur
pambagyaharja saking ingkang hamengku gati, ingkang dipunsalirani
panjenenganipun Bpk Surasa.
3)
Pasrah
lamaran dening Bpk Marsudi minangka talanging atur saking kulawarga calon
besan.
4)
Atur
panampining lamaran ingkang badhe dipun kasalirani panjenganipun Bpk Surasa.
5)
Sumene.
6)
Pamitan
saking kulawarga calon besan ingkang badhe atur pangandikan Bpk Marsudi.
7)
Panutup.
Mekaten menggah
rantamaning adicara ing wekdal menika. Sumangga kita wiwiti kanthi dedonga
sesarengan, nyenyuwun dhumateng Gusti Ingkang Maha Agung, mugi-mugi adicara
pasrah panampining lamaran menika tansah pinaringan rahayu wilujeng ngantos
dumugi paripurnaning acara. Sumangga kula dherekaken.
... dedonga
kawiwitan... cekap
Matur nuwun. Adicara ingkang angka kalih inggih menika
atur pambagyaharja saking ingkang hamengku gati, ingkang badhe dipunsalirani
panjenenganipun Bapak Surasa, dhumateng Bapak Surasa kula sumanggakaken.
2.
Atur
pambagyaharja saking ingkang hamengku gati.
Assalamu ’alaikum Wr. Wb.
Nuwun, dhumateng ngarsanipun para pinisepuh, sesepuh
ingkang tansah kula bekteni, para kulawarga calon besan ingkang kinurmatan saha
para rawuh ingkang minulya.
Kabagyan, kawilujengan, saha karahayon saking ngarsa
dalem Gusti Ingkang Maha Welas Asih tansah kajiwa kasalira dhumateng kula lan
panjenengan sedaya.
Ingkang sepisan Bapak/Ibu Darmo Wiyono sakulawarga
lumantar kula, ngaturaken sugeng rawuh dhumateng para duta saraya saking Bapak/Ibu
Hadi Siswanto saha dhumateng para rawuh sedaya. Sinarengan raos panuwun ingkang
tanpa upami, dene panjengan sedaya sampun kersa nglonggaraken wekdal rawuh ing
pahargyan menika. Mugi para rawuh kasuwun lelenggahan kanthi mardikaning
penggalih, ngantos paripurnaning adicara ing wekdal menika.
Para rawuh ingkang kinurmatan, ing tembe panjenenganipun
Bapak Hadi Siswanto sampun pirembagan kaliyan panjenenganipun Bapak Darmo
Wiyono sekaliyan, ing samangke badhe netepi darmaning sepuh, inggih menika
ndhaupaken Bagus Tedi permadi, putra Bapak/Ibu Hadi Siswanto kaliyan Rara Putri
Ayu Kencana, putra Bapak/Ibu Darmo Wiyono.
Pramila ing kalenggahan menika badhe katindakaken tata
upacara pasrah panampining lamaran. Mugi mugi adiocara menika saged kalampahan
kanthi rancag saha tansah manggih rahayu wilujeng. Ugi boten kesupen menawi
Bapak/Ibu Hadi Siswanto anggenipun nampi rawuh panjengan sedaya kathah
kekirangan, Bapak/Ibu Hadi Siswanto sekaliyan tansah nyadhong agenging samodra
pangaksami.
Ing wasana cekap semanten atur kula, menawi kathah
kalepataning atur saha wonten solah bawa utawi tindak-tanduk ingkang boten nuju
prana dhumateng penggalih panjenengan sedya kula nyuwun agunging
pangapunten.Nuwun.
Wassalamu ’alaikum Wr. Wb.
MC : Para rawuh ingkang kinurmatan, mekaten kala wau atur
saking Bapak Surasa minangka sulih sarira saking ingkang hamengku gati. Acara
ingkang salajengipun inggih menika atur pasrah lamaran saking duta saraya calon
besan. Dhumateng Bapak Marsudi kula sumanggakaken.
3.
Atur
pasrah lamaran
Assalamu ’alaikum Wr. Wb.
Kula nuwun.
Dhumateng panjejnenganipun para pepundhen, parea
pinisepuh, sesepuh ingkang satuhu kula bekteni. Bapak Darmo
Wiyono sakulawarga ingkang
kula kurmati saha para rawuh kakung sumawana putri ingkang bagya mulya.
Langkung rumiyin sumangga kita tansah ngaturaken raos
puja puji pudyastuti dhumateng Gusti Ingkang Maha Welas lan Asih, ingkang
sampun paring pinten pinten karohmatan saha hidayah saengga ing titiwanci
menika kita saged kempal manunggal kanthi pinayungan karaharjan saha
kawilujengan.
Sak derengengipun kula nyuwun pangapunten, amargi sampun
kumawani ngadeg wonten ngarsanipun panjenengan sedaya.
Bapak/Ibu Darmo Wiyono ingkang
tansah kula kurmati ingkang sepisan kula sulih sarira saking Bapak Hadi
Siswanto ngaturaken salam taklim katur wontenngarsa panjenengan sakaluwarga.
Ingkang
kaping kalih, Bapak Hadi Siswanto ngersakaken ngebun-ebun enjang anjejawah sonten,
keparengan badhe kadhaupaken kaliyan putra jalunipun, anama Tedi Permadi
ingkang samenika ugi ndherek sowan ngabyantara wonten dalemipun Bapak Darmo
Wiyono inkang luhur ing budi. Ingkang kaping tiga, bapak Hadi Siswanto sekalian
namung saged ndherek menggah rerantaman dhaupipun temanten kekalih menawi
sampun dumugi titi wancinipun. Calon temanten saged kaijabna saha kapanggihna
manut satataning agami saha adat ingkang lumampah wonten mriki.
Salajengipun
minangka panutuping atur, manawi Bapak Hadi Siswanto sekaliyan sakulawarga
anggenipun ngaturaken sarana menika kathah kekirangan panjenenganipun Bapak
Darmo Wiyono sekaliyan mugi keparenga nampi kanthi lila legawaning manah.
Menika
ingkang saged kula aturaken, kathah kalepataning atur saha trapsila anggen kula
matur, kula nyuwun agunging sih samodra pangksami. Nuwun.
Wassalamu ’alaikum Wr. Wb.
MC :
mekaten, menggah atur pasrahipun lamaran Bapak Marsudi minangka duta saking
calon besan ing acara menika. Salajengipun pasrah lamaran menika badhe
dipuntampi panjenenganipun Bapak Surasa minangka sulih sarira Bapak Darmo
Wiyono sekaliyan. Dhumateng Bapak Surasa wekdal saha papan kula aturaken.
4.
Atur panampining pasrah lamaran
Nuwun
panjenenganipun Bapak Marsudi minangka duta saraya saking panjenenganipun Bapak
Hadi Siswanto sekaliyan ingkang tansah kula kurmati, saha para rawuh ingkang
kinurmatan.
Kawilujengan,
saha karaharjan saking Gusti Allah mugi kasalira dhumateng kula panjenengan
sedaya.
Kula
minangka tetalanging basa, saking panjenenganipun Bapak Darmo Wiyono sekaliyan,
ingkang sepisan salam saha taklim ingkang kaparingaken sampun kula tampi kanthi
renaning manah. Kosok wangsulipun mugi salam taklim kula mugi kaaturaken
dhumateng Bapak-Ibu Hadi Siswanto ingkang ngutus panjenengan.
Ingkang
kaping kalih, menggah lamaran panjenegan, satuhu damel kejoting manah kula.
Anak kula pun Putri Ayu Kencana
menika tebih saking rupi tur kiranging warni, tebih saking ngelmi, cumpen mring
seserepan. Parandene damel sengseming manah Anakmas Tedi Permadi. Pramila
kersanipun Bapak-Ibu Hadi Siswanto lumantar panjenengan damel ayem tentreming
manah kula kados siniram banyu sawindu, kula rumaos begja kemayangan kados
kadhawahan daru.
Wondene
atur saha paringipun jejangkeping palakrami, kula tampi kanthi suka bingahing
manah. Mboten kekilapan, ugi ngaturaken agunging panuwun shumateng Bapak Hadi
Siswanto mugi dadosa sarana raketing manah.
Pungkasing
atur, manawi anggenipun kula nampi pangandikan panjenengan minanka duta saraya
Bapak Hadi Siswanto sekaliyan, kathah kirangipun saha kirang trapsila ing solah
bawa, kula nyuwun samodra pangaksami. Nuwun.
Wassalamu ’alaikum Wr. Wb.
MC : mekaten
atur panampining lamaran ingkang dipunkasalirani panjenganipun Bapak Surasa.
Para rawuh ingkang minulya, sampun kaleksanan sedaya adicara ing dinten menika
kanthi wilujeng boten kirang satunggal menapa. Lan ing wekdal menika keparenga
panjenengan sedaya lelenggahan kanthi saprayoginipun sinambi angrahapi
pasugatan ingkang sampun dipunaturaken kanthi mardikaning penggalih saha wekdal
ingkang sacekapipun.
Tidak ada komentar:
Posting Komentar